Mjeku infeksionist, Pëllumb Pipero e nisi shumë herët ditën këtë të dielë me një mesazh të dedikuar për shqiptarët.
Duke qenë se gjatë ditëve të fundit është vënë re një rritje e numrit të rasteve me koronavirus, Pipero apeloi në “Facebook” që të gjithë qytetarët të tregohen të kujdesshëm.
Sipas tij, është i dhimbshëm fakti që vendet e tjera po mbyllin kufijtë me Shqipërinë për këtë shkak, duke ju referuar këtu rastit të Malit të Zi.
“Nuk dua t’ju zgjoj, por zgjohuni me një mesazh nga unë/dhe ne, të pa gjumit! Është trishtuese të dëgjosh se Shqipërisë i mbyllen kufijtë, është edhe më trishtuese të dëgjosh se sot, disa muaj mbas fillimit të epidemisë, në spitalin Covid 1, shtrohen mbi 20 të sëmurë, shumë më shumë se sa u shtruan në një ditë, në fillim të kësaj epidemie në vendin tonë. Dhe pse vallë?! Mos virusi u zhduk? Mos vallë pandemia mbaroi? Mos vallë virusi nuk qarkullon më mes nesh dhe me ne çdo ditë, orë e minutë? Mos vallë shkenca zbuloi një vaksinë?! Mos vallë ne mjekët kemi në dorë një medikament kundër këtij virusi ende vrasës? JO! Virusi është ende midis nesh! Ne ende nuk kemi një vaksinë! Ne ende nuk kemi një ilaç ndaj tij! Po si dhe me çfaë mund ta luftojmë?! Vetëm me një armë! Me distancë dhe me maskë!”
Pipero ju lut qytetarëve që të zbatojnë këto dy rregulla bazë ose në rast të kundërt Shqipëria do të kthehet shumë mbrapa.
“Ruani distancën dhe mbani maskën! Ndryshe do na ktheni shumë mbrapa në kohë, edhe pse të hapur brenda nesh, do jemi të mbyllur për Europën! Ju lutem më dëgjoni SOT! Nesër është shumë vonë! Qeveria nuk ka asgjë në dorë! Gjithçka është në duart tona! Ju lutem më dëgjoni mua! Mos dëgjoni politikanët sot! Dëgjoni specialistët! Maska dhe distanca! Vetëm kaq mjafton! Kaq pak, për të përfituar më shumë liri në pandemi, më shumë ekonomi në pandemi, më shumë argëtim në pandemi, dhe aspak izolim me botën që po hapet çdo ditë! Na i hiqni kufijtë, duke i vënë kufi virusit, thjesht dhe vetëm me një maskë dhe distancë!”
Autoritetet malazeze vendosën të mbyllin kufijtë tokësorë me Shqipërinë dhe të lejojnë hyrjen tranzit në territorin malazez vetëm për shtetasit që posedojnë një dokument që rezultojnë negativ ndaj COVID-19, të bërë brenda 48 orëve.
Një vendim i tillë erdhi si pasojë e rritjes së numrit të rasteve të reja me koronavirus në vendin tonë, duke e kaluar 700 raste aktive.
