Pedagogia e njohur Valbona Nathaili ka evidentuar problematikat me të cilat po përballet sot arsimi. Ajo e sheh të pavend ndryshimet në ministri ku u shkarkua Evis Kushi dhe në vend të saj u emërua Ogerta Manastirliu, teksa thekson se vendi jonë nuk është në luftë për të tilla rrotacione.
“Viti i kaluar ka qenë me problematika dhe disa vite rresht problemet në arsim kanë qenë të shumta me ndodhira të papëlqyera, me problematika sa i takon arritjes së të rinjve, me problematika sa i takon braktisjes, frekuentimit të degëve të mësuesisë në arsimin e lartë. Duhej që ky vit të paktë të ishte një lloj përpjekje e përbashkët për të korrigjuar shumë nga gabimet që kemi patur për një periudhë të gjatë. Kalimet nga një ministri në një ministri tjetër jemi mësuar ti shohim në situata lufte. Gjithsesi suksese ministres së re dhe uroja ta kap sa më shpejt ritmin e punëve të shumta që ka arsimi”, tha Valbona Nathaili në Quo Vadis.
