Partia Demokratike, përmes sekretarit Gazment Bardhi ka reaguar lidhur me qëndrimin e kryeministrit Edi Rama për deklaratën e ministres së Shëndetësisë, Ogerta Manastirliu dje në Parlament.
Nëpërmjet një postim në “Facebook”, Bardhi shkruan se Rama është gjithmonë gati për të mbrojtur korrupsionin. Sipas demokratit, sa më shumë përkeqësohet situata e pandemisë, aq më i zellshëm është Rama në mashtrime dhe videomontazhe.
“Edi Rama nuk zhgënjeu edhe sot! Është gjithmonë gati për të mbrojtur krimin dhe korrupsionin. Sa më shumë përkeqësohet situata e pandemisë, aq më jashtë realitetit shfaqet Edi Rama dhe aq më i zellshëm është në mashtrime dhe videomontazhe. Përpiqet të mashtrojë shqiptarët se nuk panë atë që panë dhe nuk dëgjuan atë që dëgjuan nga Ministrja e tij e Shëndetësisë: “Nëse kemi mbingarkesë në spitale, do të përballemi me zgjedhjen se kush do të trajtohet i pari”. Ajo çfarë ka thënë Ministrja e Shëndetësisë është reflektim i situatës ku e ke zhytur Edi Rama vendin. Vetëm për të mos hequr dorë nga vjedhja me inceneratorët, koncesionet e tenderat Edi Rama i ka lënë shqiptarët të vetëm përballë krizës shëndetësore dhe asaj ekonomike.
Bardhin thekson mes të tjerash se propaganda e egër e Ramës nuk fshin dot faktet.
“Sot në sistemin shëndetësor publik mungojnë tamponët për testim. · ISHP vonon deri në 10 ditë përgjigjet e tamponëve. · ISHP nuk ndjek zinxhirin e infektimeve për të ndaluar përhapjen e tij. · Njerëzit nuk marrin kurim derisa shtrohen në gjendje kritike. · Shqipëria ka numrin më të ulët të testimeve në Europë, numrin më të ulët të mjekëve dhe kapaciteteve spitalore. Të gjitha këto janë përgjegjësi direkte e dështimit të Edi Ramës dhe Ogerta Manastirliut, që paguhen me shëndetin dhe jetën e qytetarëve. Me propagandën dhe videomontazhet e Edi Ramës humbasin njerëzit e zakonshëm.”
