Sekretari i Përgjithshëm i PD, Gazment Bardhi e konsideron një skenar mafioz ndryshimin e masës së sigurisë nga “arrest me burg” në “detyrim paraqitje” për ish-kryebashkiakun e Vorës, Agim Kajmaku.
Në një postim në “Facebook”, Bardhi shkruan se policia bëri dje sikur e arrestoi papritur, pas arratisjes 7 mujore, ndërsa drejtësia, e liroi sot nga burgu. Sipas tij, gjithçka ishte llogaritur që Kajmaku të mos vuante asnjë ditë burg.
“Një skenar mafioz u zbatua 24 orët e fundit nga qeveria dhe drejtësia për të lënë të lirë Agim Kajmakun e Vorës. Policia bëri dje sikur e arrestoi papritur, pas një gjoja arratisje 7 mujore, ndërsa drejtësia, nën diktatin e qeverisë, e liroi sot nga burgu. Gjithçka ishte llogaritur që lulishtari i oborrit 1 milionë euro të Edi Ramës në Surrel të mos vuante asnjë ditë burg. Agim Kajmaku, një fallsifikator, që fshehu krimin në formularin e dekriminalizimit, u mbrojt nga Edi Rama. Kryeministri nuk e shkarkoi nga detyra, megjithëse ne provuam me dokumenta se kryebashkiaku ilegjitim i Vorës kishte mashtruar dhe ishte në shkelje flagrante të ligjit. Gjatë kohës së “arratisë”, Agim Kajmaku u pagua 200 milionë lekë nga pushteti e Edi Ramës, duke vendosur rekord sesi një person që kërkohet nga policia, përfiton njëkohësisht miliona lekë nga tendera publikë. Ky është një pushtet i kalbur që duhet shkulur me rrënjë, sa më parë”, shkruan Bardhi.
Kajmaku u arrestua një ditë më parë në ambientet e spitalit privat kontinental në Tiranë, pasi ishte paraqitur për shkak se kishte probleme kardiake dhe me diabetin.
