Partia Demokratike paralajmëroi se do t’u drejtohet autoriteteve për të dorëzuar një padi për inceneratorin e Tiranës. Sekretari për Çështjet Ligjore, Çlirim Gjata akuzoi mazhorancën se po vepron si grup i strukturuar kriminal për të vjedhur 400 milionë euro.
“Qeveria e Edi Ramës dhe Bashkia e Tiranës, e drejtuar nga Erion Veliaj, kanë vepruar si një grup i strukturuar kriminal në lidhje me ndërtimin e inceneratorit të Tiranës. Me inceneratorin e Tiranës ka patur veprime të paramenduara dhe planifikuara, duke nisur nga Edi Rama dhe Erion Veliaj, në dëm të interesit publik. Bëhet fjalë për një biznes ku shteti do të paguajë rreth 400 milionë euro tek privati që fshihet në parajsë fiskale dhe askush nuk e di kush është. Hetimi limonatë për “pabarazi në tendera” është tallje me djersën e shqiptarëve. Partia Demokratike do të depozitojë shumë shpejt padinë e vërtetë penale për inceneratorin e Tiranës. Bashkëpunimi kriminal i këtij pushteti për të përfituar kundër interesit të qytetarëve, do të duhet të ndëshkohet!”
Më herët, zëdhënësja e PD, Ina Zhupa deklaroi se për këtë incinerator kryebashkiaku Erion Veliaj ka paguar 1 miliardë lekë nga fondi publik, edhe pse duhet të ishte një investim privat.
