Kreu i Bindjes Demokratike, Astrit Patozi vizitoi Elbasanin këtë të diel me rastin e Ditës së Verës. Ai përdori ballokumet e prishura si simbolikë për të treguar “produktet” që ofrojnë partitë e vjetra në prag të zgjedhjeve të 25 prillit. Sipas tij, në këtë datë, qytetarët nuk duhet të gënjehen më, por të sjellin verën.
“Sot në Elbasan nuk ishte një ditë me diell, por një ditë gri. Gjë që tregon se vera vetëm festën ka sot, por duket se ajo do të vonohet pak. Ne shpresojmë shumë që ajo të vijë më 25 prill, por që kjo të ndodhë qytetarët e Elbasanit dhe të gjithë Shqipërisë duhet të ndërrojnë dyqanin e ballokumeve. Sepse nuk mund të shkojnë tek të njëjtët shitës mashtrues, që i gënjejnë me produkte falso dhe ballokume të prishura, një herë në çdo dy vjet, sa herë ka zgjedhje në Shqipëri. Ndaj edhe ajo që presim është që ata të refuzojnë afertat e rreme më 25 prill, por të përqafojnë ndryshimin. Edhe sot në Elbasan ata e treguan se nuk kanë ndryshuar asgjë, pasi u zunë dhe u sherrosën me njëri-tjetrin, duke e bërë të qartë se është e vetmja gjë që dinë të bëjnë, madje edhe në ditë feste, kur politika normalisht duhet të ulë armët.”
Patozi i bëri këto deklarata pas një takimi me kandidatët për deputetë të Bindjes Demokratike për Qarkun e Ebasanit, të clët shprehën besimin për një sukses të sigurt në zgjedhjet e 25 prillit.
