Bashkimi Evropian ka pezulluar tarifat që miratoi një ditë më parë ndaj mallrave amerikane pas vendimit të Trump i cili vendosi një ndalesë për të njëjtin afat kohor.
“Ne duam t’i japim një shans negociatave. Ndërsa finalizojmë miratimin e kundërmasave të BE-së që panë mbështetje të fortë nga shtetet tona anëtare, ne do t’i vendosim ato në pritje për 90 ditë. Nëse negociatat nuk janë të kënaqshme, kundërmasat tona do të fillojnë. Puna përgatitore për kundërmasa të mëtejshme vazhdon”, tha presidentja e Komisionit Evropian, Ursula von der Leyen.
Lexo edhe :
Related Posts
Megjtihatë Von der Leyen theksoi se të gjitha opsionet mbeten ende në tavolinë.
Trump njoftoi zyrtarisht të mërkurën pezullimin e tarifave ndaj 75 vendeve të botës për të cilat tha se kanë bashkëpunuar në mënyrë konstruktive me zyrtarët amerikanë, ndryshe nga Kina.
“Bazuar në mungesën e respektit që Kina ka treguar ndaj Tregjeve Botërore, po e rris tarifën e vendosur ndaj Kinës nga Shtetet e Bashkuara të Amerikës në 125%, me efekt të menjëhershëm. Shpresojmë se së shpejti, Kina do ta kuptojë se ditët kur e mashtronin SHBA-në dhe vendet e tjera nuk janë më të qëndrueshme apo të pranueshme”, deklaroi Trump.
Kina kishte rritur tarifat ndaj SHBA-së nga 34 në 84% një ditë më parë kur hyri në fuqi vala e dytë e tarifave amerikane.
Ndërkohë tregjet financiare globale, janë rikthyer sot me një performancë të fuqishme me rritjen më të konsiderueshme në më shumë se një dekadë.
Por megjithatë, pasiguria mbetet e madhe./vizionplus.tv
