Kryedemokrati Sali Berisha, duke folur nga selia e PD-së, paralajmëroi policinë të ndalë dhunën ndaj protestuesve, duke theksuar se secili prej tyre do të marrë përgjigjen që meriton.
Sipas tij, sjellja e protestuesve ka qenë e qetë.
“U them unë atyre që vetëpërmbajtja, guximi dhe qëndrimi paqësor i protestuesve është qindra herë më i fuqishëm se banditizmi i tyre. Dhjetëra mijëra guximtarëve u mjaftojnë pak minuta për t’ju dhënë atë që meritoni. Vetëpërmbajtjen e tyre mos e merrni për dobësi; ajo është vendosmëri për të realizuar qëllimin për ta hedhur në koshin e plehrave të historisë një nga armiqtë më të rrezikshëm të kombit shqiptar, Edi Ramën. Mos mendoni se durimi ka fund; ju garantoj se kjo vetëpërmbajtje dhe kjo vendosmëri e jona nuk mund të provohet pafundësisht dhe provokatorët do të marrin mësimin që meritojnë”, tha Berisha.
Më tej, kryedemokrati dënoi edhe dhunën ndaj deputetëve të PD-së.
“Këta banditë goditën sot deputetët e opozitës. I siguroj dhe i garantoj se, edhe prapa diellit po të shkojnë, do të gjenden”, u shpreh Berisha.
