Pas Macronit, edhe Erdogani “viktimë” e eskortës së Trump, por presidenti turk reagoi ndryshe
Një situatë e pazakontë ndodhi në Nju Jork gjatë zhvillimit të Asamblesë së Përgjithshme të OKB-së, ku masa të rrepta sigurie për lëvizjen e eskortës së Presidentit amerikan Donald Trump shkaktuan bllokim të përkohshëm të qarkullimit, duke i lënë disa liderë botërorë të presin në rrugë.
Pas presidentit francez Emmanuel Macron, këtë herë në “kurthin” e masave të sigurisë ra edhe presidenti i Turqisë, Recep Tayyip Erdogan, i cili u detyrua të qëndronte në këmbë për disa minuta, në pritje që të përfundonte kalimi i eskortës së Trump.
Ndryshe nga Macron, i cili e kaloi situatën me sportivitet dhe madje bëri edhe një telefonatë plot humor presidentit amerikan, Erdogan nuk e fshehu pakënaqësinë e tij. Pamjet tregojnë presidentin turk të tensionuar dhe të qartë në shqetësimin e tij, pa asnjë tentativë për ta relativizuar situatën.
Gjatë mbrëmjes së së hënës, pas fjalimit të tij në OKB ku njoftoi edhe vendimin e Francës për njohjen e shtetit të Palestinës Macron, teksa largohej nga ndërtesa e OKB-së, u përball me një bllokadë policore që e detyroi të ndalonte për shkak të kalimit të eskortës së Trump.
“Na falni, zoti President, gjithçka është mbyllur për momentin. Lëvizja është ndalur për shkak të eskortës së presidentit Trump,” i tha një oficer policie Macronit, i cili reagoi me qetësi dhe humor, duke telefonuar vetë Trump-in dhe duke i thënë:
“Mendo pak, jam bllokuar në rrugë sepse gjithçka është ndalur për ty!”
/vizionplus.tv
