Kryeministri Edi Rama dhe Zv. Kryeministrja dhe Ministrja e Infrastrukturës dhe Energjisë, Belinda Balluku, vizituan sot parkun eolik të Tropojës, një nga investimet më të rëndësishme në sektorin e energjisë në vend.
Rama tha se finalizohet një përpjekje 2-vjeçare dhe shprehu besimin se, brenda 12 muajve dhe pa llogaritur periudhën e dimrit intensiv, ky park energjetik do të hyjë në rrjetin e prodhuesve të energjisë së rinovueshme në Shqipëri.
Ai shtoi se ky investim është pjesë e strategjisë për ta bërë Shqipërinë një vend sovran në prodhimin e energjisë, duke shmangur nevojën për të blerë sasi të mëdha energjie me çmime të larta nga tregu ndërkombëtar gjatë periudhave kur mungojnë shirat.
Rama: Më vjen mirë që sot finalizojmë një përpjekje 2-vjeçare. Ne shpresojmë që gjithçka të shkojë ashtu si duhet dhe në harkun e 12 muajve, pa llogaritur periudhën kur dimri është intensiv ky park i madh i energjisë së erës në Tropojë, të hyjë në rrjetin e prodhuesve të energjisë së rinovueshme në vendin tonë. Unë kam besim që jo vetëm do të përfitojmë një burim të ri dhe të fuqishëm energjie të rinovueshme, por do të përfitojmë edhe dije të reja dhe do të përfitojmë një vlerë të shtuar në kulturën e punës dhe veprimit në një sektor kaq strategjik.
Edhe ky investim shkon në ate drejtim strategjik dhe në rrugën e përmbushjes së atij objektivi të madh strategjik për ta bërë Shqipërinë një vend sovran në prodhimin e energjisë. Ne kemi trashëguar një sistem me shumë të çara, sa që kur na ka munguar shiu na është dashur të dalim në tregun ndërkombëtar dhe të blejmë sasi të mëdha energjie me çmime të kripura. Koha kur Shqipëria duhet të dalë në treg për të blerë energji po shkon drejt fundit. Ne do të jemi në kategorinë e atye jo shumë vendeve që gëzojnë pavarësi të plotë kur vjen puna te prodhimi i kësaj lënde vitale për organizmin e një shteti. Kjo si rezultat i investimeve të bëra gjatë gjithë këtyre viteve.
