Kryebashkiaku i ri i Paris, Emmanuel Gregoire, prezantoi sot një “plan veprimi” për të parandaluar ngacmimet seksuale ndaj fëmijëve gjatë aktiviteteve pas-shkollore që organizon qyteti.
Ky plan, me një vlerë të parashikuar prej rreth 20 milionë eurosh, synon të garantojë “transparencë të plotë ndaj familjeve”, deklaroi Gregoire në një intervistë për gazetën Le Monde. Ai vendosi programet pas-shkollore si “prioritet absolut” të mandatit të tij dhe theksoi se do të publikojë çdo tremujor statistikat dhe numrin e pezullimeve të përgjegjësve të aktiviteteve, të cilat aktualisht janë të vështira për t’u marrë nga grupet e prindërve.
Si pjesë e planit, çdo shkollë do të ketë një “broshurë mirëseardhjeje” dhe takime fillestare me prindërit, ndërsa gjithashtu do të krijohet një sistem i thjeshtë dhe i qartë për raportimin e çështjeve: prindërit mund të kontaktojnë drejtpërdrejt një njësi mbështetëse, ndërsa qyteti do të vazhdojë të pezullojë përgjegjësit me çdo dyshim të bazuar.
Gregoire theksoi se “shumica dërrmuese e rasteve” të ngacmimit seksual janë regjistruar gjatë viteve 2024 dhe 2025, kryesisht në kopshte. Në vitin 2025, 30 përgjegjës aktivitete u pezulluan në Paris, prej të cilëve 16 për ngacmime të dyshuara seksuale, sipas të dhënave të bashkisë.
Ai pranoi se gabimi kolektiv ka qenë trajtimi i këtyre rasteve si incidente të izoluara, ndërkohë që ato pasqyrojnë një rrezik sistemik dhe ndoshta një kod heshtjeje të brendshëm.
Gregoire gjithashtu zbuloi se vetë kishte qenë viktimë e abuzimit seksual në programe pas-shkollore kur ishte fëmijë, duke nxjerrë në pah rëndësinë e masave parandaluese dhe mbrojtëse.
/vizionplus.tv
