Tea Harizi sapo ka përfunduar vitin e parë të studimeve në programin “Mjekësi e Përgjithshme” dhe gjendet përballë ligjit që i merr peng diplomën, nëse nuk shlyen 3 deri në 5 vite punë të detyruar.
TEA HARIZI
STUDENTE E MJEKESISE
“Është data 21 korrik, mesi i vapës ndërkohë studentët e mjekësisë duhet të vijnë këtu në godinat e fakultetit të shkencave të natyrës sepse në fakultetin tonë kemi mungesë godinash. Për mua është absurde që të thonë se viti i ri akademik do të kushtojë 5300 euro siç e ka thënë dhe kryeministri apo ministrja Kushi. Unë vetë nuk kam për ta pranuar marrëveshjen, do rezistojmë deri në fund. Familja ime si të gjithë familjet shqiptare ku pjesa dërrmuese është me të ardhura ekonomike mesatare, ne nuk kemi mundësi të paguajmë nje shifër marramendese nëse e shumëzojmë me 6 vite.”
Do të jetë Këshilli i Ministrave ai që do të përcaktojë vlerën e një viti akademik, nëse studentët nuk pranojnë marrëveshjen me shtetin, por shifrat që qarkullojnë ndërkohë kanë krijuar paqartësi dhe zemërim.
I pyetur nga Vizion Plus, rektori i universitetit të mjekësisë, Arben Gjata shprehet se nga llogaritja e pak viteve më parë, rezulton që çdo vit akademik të kushtojë rreth 3 milion lekë.
Por në relacionin e dorëzuar në kuvend, përmendet një shifër prej rreth 700 mijë lekësh të rinj.
RELACION
“Sipas informacionit të përcjellë nga Universiteti i Mjekësisë, Tiranë, kostoja e studimit për programin e integruar të studimit në “Mjekësi e Përgjithshme” është 678 994 lekë në vit për student.”
Sakaq, ekspertët e arsimit vërejnë kundërshti mes ligjeve, ndërsa efektet e kësaj vendimmarrje do të jenë afatgjata, në dëm të shoqërisë.
NDRIÇIM MEHMETI
EKSPERT ARSIMI
“Neni 3 i ligjit 80 viti 2015 i arsimit të lartë thotë që tarifat i përcakton universiteti. Nuk ka punë VKM-ja por senati dhe bordi. Ne kemi në arsimin privat universitete të certifikuara nga BE që kanë tarifa deri në 4500 euro. Nuk zgjidhet kjo punë me VKM por me plotësim kushtesh dhe status social.”
Në pritje të vendimit, maturantët kanë një javë kohë të mendohen për zgjedhjen që do të bëjnë, ndërsa aplikimi për në universitet nis më datë 29 korrik.
