Presidenti amerikan Donald Trump ka përshëndetur marrëveshjen e përbashkët të mbrojtjes të nënshkruar nga Arabia Saudite, Turqia dhe Pakistani, duke e cilësuar atë si një hap të rëndësishëm drejt forcimit të bashkëpunimit dhe sigurisë në Lindjen e Mesme. Marrëveshja e nënshkruar në Mekë më 7 gusht parashikon bashkëpunim në mbrojtjen kolektive dhe një koordinim më të ngushtë ushtarak mes tre vendeve.
Në reagimin e tij, Trump u shpreh I lumtur për nënshkrimin e marrëveshjes dhe e vlerësoi atë si një zhvillim pozitiv për rajonin.
“Jam shumë i lumtur të shoh se Arabia Saudite, Turqia dhe Pakistani së fundmi kanë nënshkruar marrëveshjen e përbashkët të mbrojtjes”, tha Trump.
Trump e sheh marrëveshjen si një shenjë të afrimit mes vendeve të rajonit dhe të përpjekjeve të tyre për të krijuar mekanizma më të fortë për mbrojtjen e përbashkët.
“Ky është një tregues se Lindja e Mesme po bashkohet dhe se vendet më në fund do të jenë në gjendje të mbrohen në një mënyrë më kuptimplotë”, shtoi Trump.
Pakti i ri i sigurisë vendos në një strukturë të përbashkët Turqinë, Arabinë Saudite dhe Pakistanin, tre vende me peshë të rëndësishme ushtarake dhe strategjike në botën myslimane. Marrëveshja parashikon që një sulm i armatosur ndaj njërit prej vendeve të konsiderohet si sulm ndaj të tre shteteve një parim që i ngjan mekanizmit të mbrojtjes kolektive të NATO-s.
Megjithatë, autoritetet turke kanë theksuar se marrëveshja është konceptuar si mekanizëm parandalues dhe mbrojtës, dhe jo si një aleancë me karakter ofensiv. Ankaraja ka deklaruar gjithashtu se pakti nuk synon një vend të caktuar dhe se mund të zgjerohet në të ardhmen.
Në këtë kuadër, Egjipti është një prej vendeve që po shqyrton mundesine për t’iu bashkuar marrëveshjes. Ministri i Jashtëm turk, Hakan Fidan eshte shprehur se shpresën që Kajro të bëhet pjesë e këtij mekanizmi, ndërsa autoritetet egjiptiane kanë bërë të ditur se po e studiojnë mundësinë e anëtarësimit.
Zgjerimi i mundshëm do t’i jepte paktit një peshë edhe më të madhe politike dhe strategjike në Lindjen e Mesme, në një kohë kur rajoni po përballet me tensione të forta dhe pasiguri.
Marrëveshja e Mekës shihet tashmë si një përpjekje për të krijuar një arkitekturë më të pavarur të sigurisë në rajon. Dhe ndërsa vendet nënshkruese kërkojnë të zgjerojnë bashkëpunimin, mbetet për t’u parë nëse kjo aleancë do të shndërrohet në një strukturë të qëndrueshme rajonale apo do të mbetet kryesisht një sinjal politik dhe strategjik.
