Qeveria e ekstremit të djathtë të Italisë ka miratuar një ligj të ri për të kapërcyer një vendim gjykate që rrezikon të bllokojë marrëveshjen shumëmilionëshe të vendit me Shqipërinë që synon frenimin e ardhjeve të emigrantëve.
Sipas “The Guardian”, Këshilli i Ministrave miratoi dekretin pas një mbledhjeje urgjente të mbajtur të hënën vonë pasdite. Qëllimi i ligjit të ri është të hartojë një listë të re të vendeve të sigurta, e cila mund të përditësohet çdo gjashtë muaj dhe të lejojë një gjykatë të apelit të rishqyrtojë vendimet që urdhërojnë transferimin e azilkërkuesve në Itali. Tani e tutje, vendi i origjinës do të jetë kushti parësor për riatdhesimin.
Qeveria e Melonit shpreson që në këtë mënyrë vendimi i magjistratëve të lidhet me dekretet e qeverisë dhe jo me ligjet ndërkombëtare.
“Në përputhje me vendimin e Gjykatës Evropiane të Drejtësisë, vendet që përmbajnë zona territoriale të pasigurta janë përjashtuar nga lista: Nigeria, Kameruni dhe Kolumbia”, tha nënsekretari i presidencës së këshillit, Alfredo Mantovano, në një konferencë për shtyp në Palazzo Chigi pas mbledhjes së këshillit të ministrave.
Meloni tha: “Ne do të vazhdojmë të punojmë pa u lodhur për të mbrojtur kufijtë tanë”.
Vendimi erdhi pasi një gjykatë në Romë vendosi të kthejë në Itali 12 azilkërkuesit e fundit që mbahen në qendrën e re të migracionit italian në Shqipëri. Pakti Rama-Meloni ka hedhur dyshime mbi fizibilitetin dhe ligjshmërinë e planeve të BE-së për të eksploruar mënyrat për të krijuar qendra të përpunimit dhe ndalimit të emigrantëve jashtë bllokut, si pjesë e një qasjeje të re të vijës së ashpër ndaj migracionit.
