Ambasadori i Bashkimit Evropian, Luigi Soreca kërkoi që ndryshimet në paketën antishpifje të bëhen duke marrë parasysh rekomandimet e dhëna nga Komisioni i Venecias.
Përmes një postimi në “Twitter”, ai deklaroi se mazhoranca është zotuar për të reflektuar këshillat e Komisionit të Venecias në draft.
“Cdo ndryshim në draft-ligjin për antishpifjen duhet të jetë në përputhje me rekomandimet e Komisionit të Venecias për këtë çështje. Autoritetet shqiptare janë zotuar të vazhdojnë të punojnë me këtë ligj për të adresuar të gjitha çështjet që rekomandon Komisioni i Venecias në opinionin e tij. Ne mirëpresim deklaratën e shumicës qeverisëse se do të ndjekë këto rekomandime dhe se do të zhvillohen konsultat e duhura. Ne inkurajojmë autoritetet të bëjnë konsultat e nevojshme me organizatat e medias dhe shoqërinë civile. Ne do të vazhdojmë të ndjekim nga afër zhvillimet në lidhje me këtë legjislacion të rëndësishëm, në mënyrë që paketa të jetë në përputhje me të gjitha standardet përkatëse ndërkombëtare.”
