Në një adresim përpara deputetëve në Kuvendin e Kosovës presidentja Vjosa Osmani ka thumbuar kryeministrin e vendit, i cili është kritikuar nga aleatët e Kosovës për veprime të njëanshme.
“Aleancat janë këtu për na të na mbrojtur, prandaj vënia në rrezik e tyre, lutja bixhoz me to apo cenimi i tyre e cenon vet mbrojtjen e Republikës tonë. Shihni deklaratat e liderëve të superfuqive botërore, do të shihni qindra deklarata e fjalime se si çdo sfidë angazhohen ta kalojnë me aleatë, sepse nuk mund të ia dalin vetëm. Prandaj, asnjëherë nuk e kam kuptuar e as mirëkuptuar, as talljet që bëhen në llogari të aleatëve, as sulmet ndaj tyre e as keqpërdorimin i emrit të tyre për të fituar pushtet. Asnjë njëra e as tjera nuk i bën nder Kosovës. Përkundrazi, duhet shumë punë e shumë angazhim për mirëmbajtjen e aleatëve bazuar në parime dhe vlera. Vetëm kjo rrugë mund t`i çoi interesat e Kosovës përpara”, tha Presidentj Osmani.
Osmani u ndal po ashtu edhe te krijimi i Asociacionit. Ajo tha se ka kërkuar që në fillim që drafti të diskutohet me Shtetet e Bashkuara të Amerikës dhe jo me njerëz që vijnë nga shtete të cilat nuk e njohin pavarësinë e Kosovës.
“Më duhet të theksoj me keqardhje, se propozimet që shpesh kam bërë për këtë proces, shpesh janë ballafaquar me një sërë dezinformatash e sulmeve të ulëta që nuk i kanë hije askujt në Kosovë. Për të qenë më e qartë, kur kam propozuar që drafti i Asociacionit të fillohet të diskutohet, të diskutohet, me ShBA-të, në mënyrë që kjo çështje mos t’i lihet në dorë as Lajçakut e e as të tjerëve që nuk besojnë në pavarësinë e Kosovës, kjo nuk ka nënkuptuar asnjëherë që kam kërkuar themelim të Asociacionit, por ka nënkuptuar se më shumë i kam besuar vetvetes e Amerikës, se sa burokratëve nga shtetet mosnjohëse”, tha Osmani.
Osmani ka folur në lidhje me shqetësimet e ngritura për cenimin e të drejtave të shqiptarëve në Maqedoninë e Veriut.
Ajo theksoi se çdo përpjekje e tillë do të përballet më një kundërshtim të vendosur. Po ashtu Osmani kërkoi koordinimin e Prishtinës me Tiranën për të mbrojtur të drejtat e shqiptarëve, kudo që ndodhen./vizionplus.tv
