Oppenheimer, ka triumfuar në ceremoninë e Oscar-ve të këtij viti duke marrë shtatë çmime, përfshirë filmin ,aktorin dhe regjisorin më të mirë.
Irlandezi Cillian Murphy u shpall aktori më i mirë për rolin e tij në këtë film , duke mposhtur Paul Giamatti dhe Jeffrey Wright.
“Për mirë apo për keq ne të gjithë jetojmë në botën e Oppenheimer. Kjo është arsyeja pse më pëlqen t’ia kushtoj këtë çmim të gjithë atyre që kërkojnë paqen në botë”, tha Cillian Murphy.
Ndërkohë trofeun për regjisorin më të mirë e mori Christopher Nolan duke mposhtur Martin Scorsese dhe Jonathan Glazer.
“Ne nuk e dimë se nga po shkon ky udhëtim i jashtëzakonshëm nga këtu, por të dish që ju mendoni se jam një pjesë domethënëse e tij do të thotë gjithçka për mua.”, deklaroi regjisori Christopher Nolan.
Surprize ishte Emma Stone e cila mori trofeun për aktoren më të mirë për rolin si një grua e ngjallur nga të vdekurit në komedinë “Poor Things”.
Ndërkohë Robert Downey Jr fitoi çmimin aktori më i mirë dytësor, përballë Robert De Niro dhe Ryan Gosling.
Për disa kjo ishte natë historike, pasi Ukraina rrëmbeu Oscarin e parë për dokumentarin më të mirë: “20 Days in Mariupol”.
Ndërsa Britania e Madhe mori trofeun e filmit më të mirë ndërkombëtar: “The Zone of Interest”.
Ndërkohë filmi Barbie, fitoi vetëm një çmim nga tetë nominimet , atë të këngës më të mirë origjinale.
Ndërkohë John Cena befasoi në ceremoninë e ndarjes së çmimeve. Aktori u ngjit në skenë krejtësisht i zhveshur për të dorëzuar trofeun për dizajnin më të mire./vizionplus.tv
