Seksioni për Hetimin e Pastrimit të Parave dhe Aseteve Kriminale ka finalizuar operacionin policor të koduar “Dentistry”, pas zbulimit të një skeme evazioni fiskal dhe përdorimit të produkteve të skaduara në një klinikë dentare në zonën e “Don Boskos”.
Gjatë kontrolleve në ambientet e klinikës, policia sekuestroi 300 shishe me produkte, shumica të skaduara, me vlerë rreth 100 mijë euro, të cilat ishin pa fatura zhdoganimi. Po ashtu, u gjetën edhe mandate të pafiskalizuara, që përdoroheshin për shmangien e detyrimeve tatimore.
Në kuadër të operacionit u arrestua administratori i klinikës, Adnan Yizdizoglu, ndërsa u vunë nën hetim koordinatorja e subjektit dhe dy laborantët.
NJOFTIMI:
Si rezultat i administrimit të shpejtë të informacioneve të siguruara në rrugë operative, se në një subjekt (klinikë stomatologjike) në zonën “Don Bosko”, kryheshin krime ekonomike dhe krime kundër shëndetit/jetës, specialistët e Seksionit për Hetimin e Pastrimit të Parave dhe Aseteve Kriminale finalizuan operacionin “Dentistry”.
Gjatë ndërhyrjes në ambientet e klinikës, u kap dhe u arrestua administratori i subjektit, shtetasi turk, A. Y., 59 vjeç.
Gjithashtu, u kapën në flagrancë, 3 punonjës të klinikës, konkretisht koordinatorja, shtetasja B. K., 35 vjeçe, si dhe 2 laborantët, shtetasit L. S., 21 vjeçe dhe A. A., 42 vjeç, për të cilët nisi procedimi në gjendje të lirë.
Nga kontrolli në ambientet e klinikës u gjetën dhe u sekuestruan me cilësinë e provës materiale, 300 shishe me produkte (shumica, të skaduara), me vlerë rreth 100 000 euro, për të cilat nuk disponoheshin fatura zhdoganimi, si dhe mandate të pafiskalizuara. Vijojnë hetimet për të përcaktuar dëmin ekonomik që i është caktuar shtetit, si pasojë e shmangies së detyrimeve tatimore nga ky subjekt.
Materialet procedurale iu referuan Prokurorisë së Tiranës, për veprime të mëtejshme.
/vizionplus.tv
