Studiuesit skocezë dhe ata britanikë pasi kanë analizuar të dhënat e deritanishme mbi variantin e ri “Omicron”, kanë dalë në përfundimin se ka më pak gjasa të rezultojë me shtrime në spital, në krahasim me variantin Delta.

 

Reduktimi i rrezikut është përcaktuar me 2\3 megjithatë theksohet sërish transmetimi i lartë që mund të rrezikojë personat me gjendje të brishtë shëndetësore.

 

Ndërkohë, Administrata Amerikane e Ushqimit dhe Barnave ka dhënë miratimin për përdorim në raste urgjente të ilaçit antiviral Paxlovid, kundër COVID-19. Ky është trajtimi i parë që mund të merret në shtëpi, i prodhuar nga kompania Pfizer.

 

Agjencia e autorizoi ilaçin, për personat nga 12 vjeç e lart, të cilët janë në rrezik të lartë të preken nga format e rënda të sëmundjes. Provat klinike treguan 90% efektshmëri në parandalimin e shtrimeve në spital dhe vdekjeve.

 

Ilaçi merret vetëm me recetë dhe trajtimi me të duhet të nisë sa më shpejt që të jetë e mundur pas diagnostikimit me COVID-19 ose brenda pesë ditëve nga fillimi i simptomave.

 

Një tjetër ilaç që merret nga goja i kompanisë Merck & Co, që është ende nën shqyrtim nga Administrata Amerikane e Ushqimit dhe Barnave, Molnupiravir, ka treguar se redukton shtrimet në spital dhe vdekjet tek pacientët me rrezik të lartë, me rreth 30%.

 

Një ditë më parë, vaksina Turkovac e prodhuar në Turqi ka marrë miratimin për përdorim emergjent, dhe nga java e ardhshme do të kalojë në përdorim të gjerë.

Leave a Reply

Your email address will not be published.