Organizata e Kombeve të Bashkuara ka miratuar rezolutën kundër përdhunimit si një armë lufte në zonat e konfliktit.
Shtetet e Bashkuara të Amerikës kanë arritur një fitore në Këshillin e Sigurisë së Kombeve të bashkuara pas një debate të gjatë për dhunën seksuale në konfliktet e armatosura. Në mbledhjen e këshillit të sigurisë ishte i pranishëm dhe Sekretari i Përgjithshëm Antonio Guterres.
Organi i kombeve të bashkuara miratoi me 13 vota pro dhe dy abstenime të Kinës dhe Rusisë, një rezolutë për luftën ndaj përdorimit të përdhunimit si armë në luftë.
Një temë për të cilën Shtetet e Bashkuara të Amerikës kishin kërcënuar se do të përdornin veton. Kjo pasi në tekst përdorej një gjuhë për asistencën ndaj shëndetit riprodhues më saktë për mbështetjen e viktimave që kërkonin të kryenin abort.
Gjermania, e cila mban dhe presidencën e rradhës, ka punuar shumë për hedhjen në votim të kësaj resolute duke u përpjekur të tejkalojë kundërshtimin amerikan. Ndër të tjera nga rezoluta ishte eliminuar dhe një pjesë e rëndësishme, ajo që lidhej me vendosjen e një mekanizmi të ri për të monitoruar dhe sinjalizuar krime të tilla në luftë. Kjo pasi Shtetet e Bashkuara të Amerikës, së bashku me Rusinë dhe Kinën ishin deklaruar kundër.
Në selinë e OKB-së gjatë diskutimeve për miratimin e kësaj rezolute ka qëndruar edhe një delegacion nga Kosova i udhëhequr nga ish-presidentja, Atifete Jahjaga.
