Pavarësisht numrit tepër të ulët të studentëve në tri programe studimi, senati akademik i universitetit Fan Noli të Korçës ka vendosur që asnjë prej tyre të mos pezullohet për këtë vit akademik.
Bëhet fjalë për programe studimi si gjuhë dhe kulturë frënge ku janë të regjistruar vetëm dy studentë, por edhe gjuhë letërsi dhe filozofi sociologji ku ka vetëm pesë apo gjashtë studentë.
Kjo është bërë e ditur nga rektori Prof. Dr. Ali Jashari, i cili thotë se një vendim i tillë nuk do të ketë kosto shtesë për universitetin, pasi një pjesë e lëndëve janë të përbashkëta me programe të tjera studimi, ndërsa lëndët specifike do të zhvillohen nga pedagogët pa u llogaritur në ngarkesën vjetore të tyre:
Rektori i universitetit Fan Noli në Korçë tregon se një ulje e tillë e numrit të studentëve për këtë vit akademik në programe të caktuara, ka mjaft arsye, ku përfshihet edhe tejngopja e tregut të punës me disa profesione, rritja e notës mesatare, emigracioni, apo edhe dëshira e të rinjve për të studiuar në kryeqytet apo jashtë vendit.
Nga ana tjetër universiteti është duke u pergatitur për çeljen e 8 programeve të studimit të cilat janë më afër kërkesave të tregut të punës.
Një tjetër program studimi ku nuk ka pasur asnjë të regjistruar është hortikultura, program i cili rezulton i pezulluar prej dy vitesh.
