Mazhoranca nuk do të japë autorizimin për arrestimin e ish-zëvendëskryeministres Belinda Balluku duke ftuar deputetët e Kuvendit që të rrëzojnë kërkesën e SPAK. Ulsi Manja, i cili prezantoi raportin e antarëve të mazhorancës në Këshillin për Mandatet dhe Imunitetin tha se nuk plotësohen kushtet ligjore për rëndimin e masës së sigurimit ndaj Ballukut.
Gjatë mbledhjes kryeministri Edi Rama deklaroi se nuk ka ndërmend të shpallë as hero, as viktimë deputeten Belinda Balluku, duke theksuar se çështja e saj i takon drejtësisë dhe se prokuroria duhet të shterojë çdo pistë që mund të çojë te korrupsioni. Ai nënvizoi gjithashtu përgjegjësia është personale dhe theksoi se nuk ka plan të shkelë vijën e kuqe që ka vendosur pas miratimit të Reformës në Drejtësi.
Rama: Nuk kam plan ta shpall as hero, as viktimë deputeten Belinda Balluku. Shpresoj që prokuroria të shterojë çdo pistë që mund të çojë te korrupsioni. Në fund të ditës, çdokush varet nga veprimet e veta. Unë si kryeministër nuk e kam as të mundur, as të lejuar, qoftë nga ligji, qoftë nga zakoni, që t’i mbaj pishën asnjë bashkëpunëtori.
Nuk kam ndërmend as t’ju them se Belinda është një njeri që durohet lehtë në punë, pasi e dimë të gjithë sa e lehtë është të merresh me të. Nuk kam ndërmend ta shpall të pafajshme apo të shkel vijën e kuqe që kam vizatuar në këtë sallë pas miratimit të reformës në drejtësi, dhe që vlen për të gjithë njësoj.
Nuk kam ndërmend të lë pa përmendur transformimet në dy sektorët që ministrja ka ndjekur, pa ndaluar asnjë ditë. Në këto vite janë ndërtuar sipas standardeve evropiane rreth 1 mijë km të rrjetit të ri rrugor kombëtar. Ndërkohë, 40 kantierë janë të hapur në të gjithë vendin.
Gjatë këtyre 6 viteve u realizuan edhe projektet Orikum-Dukat dhe Tuneli i Llogarasë, për të cilin flitet për miliona të vjedhura, por të vetmet miliona të vërteta janë ato që janë përfituar nga rritja e fluksit të makinave drejt Jonit për ekonominë e vendit.
Korçë-Ersekë një tjetër vlerë e shtuar, Qukës-Qafë Plloçë një gropë në formë humnere, e cila na mbeti në kurriz bashkë me projektin e harTuar nga analfabetë me dy gishta. E rinisëm nga e para si projekt. Unaza e madhe e Tiranës u bë realitet vetëm kur iu qep ministrja e Infrastrukturës.
