Draftligji i Partisë Socialiste për hartën e re territoriale parashikon shkrirjen e Bashkisë Maliq dhe kalimin e saj si njësi administrative në administrimin e Bashkisë Korçë. Nëse ky propozim miratohet, mbi 30 mijë banorë të më shumë se 70 fshatrave do t’i drejtohen Bashkisë së Korçës për të marrë shërbimet administrative.
Ky propozim është kundërshtuar nga banorët e Maliqit, të cilët shprehen se shërbimet duhet të jenë sa më pranë qytetarëve dhe jo më larg. Sipas tyre, shkrirja e bashkisë do të sillte vështirësi për banorët, por edhe do të ndikonte negativisht në investimet dhe zhvillimin e zonës.
“Nuk besoj se do ta shkrijnë. Mbase janë lëvizje politike. Unë jam që shërbimet të jenë sa më afër qytetarëve. Nëse i largon, largon edhe popullin.”
“Nuk jam dakord të prishet ajo që është ndërtuar. Ne e kemi bashkinë afër dhe kemi nevojë për të. Në asnjë mënyrë nuk duhet të shkrihet.”
“Do të jetë më keq. Do të ndikojë tek investimet dhe te gjithçka që bëhet për Maliqin. Sa më larg të jenë shërbimet, aq më e vështirë bëhet për qytetarët.”
Banorët e Maliqit janë të qartë në qëndrimin e tyre: Bashkia Maliq duhet të vazhdojë të ekzistojë dhe shërbimet publike të mbeten pranë komunitetit që ajo përfaqëson.
