Kandidati për deputet i Partisë Demokratike, Flamur Noka vizitoi këtë të mërkurë shtëpitë e disa familjeve që jetojnë në kushtet tejet të vështira në Laknas.
Një nga kryefamiljarët, Ramazan Demiri u shpreh se ndihet i pashpresë.
“Jam pa punë dhe bashkëshorten e kam shumë të sëmurë. 100 mijë lekë në muaj më duhen vetëm për të siguruar ilaçet e bashkëshortes. Nuk marr as ndihmë ekonomike.”
Noka premtoi se kjo situatë do të marrë fund më 25 prill.
“Kemi një qeveri të pashpirt, që i ka vënë shkelmin qytetarëve. Janë me mijëra qytetarë që ndihen të nëpërkëmbur nga shteti. Më 25 prill kjo situatë do të marrë fund. Ne do të krijojmë një qeveri që do të kujdeset për qytetarët e saj.”
Bashkëshortja e Ramazanit tha se janë ankuar në bashki, por nuk kanë marrë asnjë lloj ndihme.
Noka e siguroi familjen Demiri se “Partia Demokratike me Lulzim Bashën kryeministër, jo vetëm që do t’u vijë në ndihmë familjeve në nevojë, por do të dyfishojë ndihmën ekonomike”.
