Sekretari i Përgjithshëm i Partisë Demokratike, Flamur Noka ka zhvilluar ditën e sotme një takim me shqiptarët në Hamburg.
Noka tha se PD beson te vota e diasporës dhe theksoi se ndryshimi qëndron në duart e emigrantëve.
Noka: Ne jemi të bindur pafundësisht se, fuqia e ndryshimit të Shqipërisë qendron në duart tuaja dhe se vota juaj do t’i japë një shans transformimit të atdheut tonë të dashur. Do të jetë vota juaj që do të çlirojë Shqipërinë tonë të dashur nga kthetrat e mafies së Xhorxh Soros që e ka kthyer atë prej 12 vitesh në një plagë lufte që ndahet nga barbarët e pushtetit.
Më tej, Sekretari i Përgjithëm i PD-së, tha se emigrantët janë shpresa e ndryshimit dhe kishte një thirrje për ta.
Noka: Ju, vëllezër dhe motra jeni shpresa e ndryshimit. Ndaj thirrja jonë për ju sot është, këtu në Hamburg, në çdo qytet në Gjermani, të Europës dhe botës. Regjistrohuni, shpresa është tek ju. Mos neglizhoni! Regjistrohuni! Vota juaj është shpresa e ndryshimit.
Për herë të parë në historinë e Shipërisë do të implementohet vota e diasporës. Shqiptarët që banojnë apo punojnë jashtë do të shprehin vullnetin e tyre politik në zgjedhjet parlamentare të 11 majit. Noka e quajti fat të madh faktin që do të votohet edhe nga vendet ku ka emigrantë.
Noka: Është fat i madh për Shqipërinë dhe për shqiptarët që, më në fund ju do ushtroni të drejtën e votës dhe me votën tuaj të mundësoni të sillni dritën në errësirën 12 vjeçare që solli Rama dhe e pllakosën në vendin tonë. Ju, do të shpëtoni Shqipërinë tonë të dashur. Ju, do ta bëni Shqipërinë me votën tuaj të ndihet krenare dhe të ndihet zonjë e madhe mes vendeve tjera të BE-së.
Në fund të fjalës së tij, Noka tha se emigrantët kanë nevojë për një qeveri që ka prioritet shqiptarët dhe hallet e tyre, dhe jo plaçkitjen e tyre. Sipas tij, e tillë do të jetë qeveria e PD dhe e Sali Berishës pas 11 majit./vizionplus.tv
