Një sulm me thikë është regjistruar mesditën e së enjtes në burgun e Malandrinos, ku objektiv ka qenë ekzekutori shqiptar i njohur me pseudonimin “Dimos”, menjëherë pas transferimit të tij në këtë institucion penitenciar.
Dhimitër Meçi, i njohur me nofkën “Dimos” konsiderohet si një nga figurat më të rrezikshme të botës së krimit në Athinë dhe dyshohet se ka qenë organizatori kryesor i tentativës për vrasjen e Jani Lalas në maj të vitit 2025.
Në atë atentat, automjeti i Lalas u qëllua me dhjetëra plumba nga armë automatike kallashnikov, por ai arriti të shpëtonte pasi udhëtonte me një makinë të blinduar.
Megjithatë, më 1 nëntor, Jani Lalas u ekzekutua në zonën e Arahova-s. Për këtë ngjarje, autoritetet greke arrestuan katër persona, shtetas grekë dhe me origjinë ruse, të dyshuar për përfshirje në vrasje.
Sipas burimeve, “Dimos” kishte lidhje të ngushta me Panajotis Vlaston, një nga drejtuesit e të ashtuquajturës “Greek Mafia”.
Pas arrestimit, ai mbahej në repartin psikiatrik të burgut të Kordhialos, ku iu nënshtrua ekzaminimeve mjekësore.
Gjatë ditës së sotme ishte planifikuar transferimi i tij në burgun e Malandrinos, por para se të dërgohej në pavijonin ku do të vuante dënimin, ai u sulmua me një mjet prerës të improvizuar nga një tjetër i burgosur.
Mësohet se Meçi ndodhet jashtë rrezikut për jetën./vizionplus.tv
