Nata e dytë e Festivalit Ndërkombëtar të Muzikës “MIK” në Korçë, u kthye në një homazh të veçantë për mjeshtrin e madh të muzikës shqiptare, Gaqo Çako.
Këngëtarë të njohur nga Shqipëria dhe jashtë saj interpretuan disa nga perlat muzikore të repertorit të pasur të tenorit të shquar shqiptar, duke rikthyer emocionet dhe artin e tij në skenë.
Tenori Kastriot Tusha, dikur student i Gaqo Çakos, si dhe tenori korçar Gjergji Mani, i cili sot është pjesë e Operas së Bukureshtit, vlerësuan figurën dhe trashëgiminë artistike të Çakos.
“Gaqo Çako mbetet një ndër figurat më të mëdha të muzikës së kultivuar shqiptare. Si pedagog, më dha më shumë se teknikë, më dha frymëzim”, tha Tusha.
“Kam pasur fatin ta takoj në vitet e para të mia si tenor. Eleganca dhe përkushtimi i tij janë të pakrahasueshme”, tha Mani.
Festivali “MIK” vijon me net të tjera artistike, ku këngëtarë dhe instrumentistë vendas e të huaj do të sjellin krijimtari shqiptare dhe ndërkombëtare, duke e bërë Korçën sërish një qendër të artit muzikor./vizionplus.tv
