Kryeministri Edi Rama dhe ministrja e Shëndetësisë, Ogerta Manastirliu inspektuan sot punimet e Pediatrisë së re të QSUT-së, nga ku theksoi se të gjitha bluzat e bardha do t’iu rritet paga me 40%.
Manastirliu deklaroi se rikonstruksioni i plotë dhe ndërtimi i godinës së re të Pediatrisë është pjesë e projektit madhor për modernizimin e Qendrës Spitalore Universitare “Nënë Tereza”.
“Eshtë një investim që pritej prej shumë vitesh, për të ofruar standardet që meritojnë mjekët por edhe që meritojnë të kenë fëmijët që trajtohen me këto shërbime. Projekti prek të gjithë pediatrinë, si godinat që i nënështrohen rehabilitimit ashtu edhe ndërtimin e godinës së re. Do të pajiset me aparatura të teknologjisë së lartë”, tha Manastirliu.
Projekti parashikon edhe ndërtimin e një godine të re, për urgjencën, reanimacionin e pediatrisë dhe sallat e kirurgjisë së pediatrisë. Ndërtimi i Spitalit të ri të Pediatrisë në QSUT, me vlerë 9 mln euro është një investim nga i cili përfitojnë rreth 130 mijë fëmijë.
