Nga stadiumi “Roza Haxhiu” në Lushnje, ku ka nisur puna për rikonstruksionin e tij, drejtuesi politik i PS per qarkun Fier, Taulant Balla iu ka bërë apel të gjithë sipërmarrësve të këtij qyteti dhe jo vetëm, që të vetëofrohen për të investuar te kjo skuadër.
Në një prononcim për mediat, ai u shpreh i vendosur se ky epik shumë shpejt “do të kthehet në eliten e futbollit shqiptar”.
“Unë do të organizoj në ditët e para të janarit një bashkëbisedim me sipërmarrjen private të Lushnjes, të cilën do ta ftoja, sepse duhet ta kuptojmë që futbolli nuk mund të bëhet me para publike, pasi janë të destinuara për investime dhe problematika të tjera të qytetit. Do t’i ftoja që të vetëofrohen dhe ta rikthejmë Lushnjen atje ku ka hije. Nuk kam asnjë dyshim që në pak kohë, Lushnja do të kthehet në kryeqytetin e futbollit shqiptar. Këtu do të jemi. Ky është një investim që nuk është më në lëmin e fjalëve, por të veprave.”
Balla gjithashtu ka falenderuar Federatën Shqiptare të Futbollit si dhe presidentin e saj, Armando Duka për mbështetjen për investimin në stadiumin e Lushnjes dhe tre fushat stervitore.
