Ka nisur intervistimi i kandidatëve për kreun e ri të Policisë së Shtetit.
14 kandidatët do të merren në intervistë nga një Komision i Posaçëm, në lidhje me platformën, që ata kanë dorëzuar në një afat kohor prej 7 ditësh. Dy gra, që ishin më herët kandidate janë skualifikuar, për shkak se nuk kanë qenë pjesë e Policisë së Shtetit.
Ndërkaq, në Ministrinë e Brendshme ka mbërritur edhe e Ngarkuara me Punë e SHBA-ve në Tiranë, Nancy Van Horn, ku do të zhvillojë një takim me ministrin e Brendshëm, Besfort Lamallari. Në qendër të diskutimeve do jetë procesi i zgjedhjes së kryepolicit të vendit.
Gjatë këtij procesi, kemi tre ish-drejtues të Policisë së Tiranës, të cilët synojnë që të drejtojnë institucionin dhe ata janë Tonin Vocaj, Lorenc Panganika dhe Rebani Jaupi, që plotësojnë dhe kriteret për të qenë pjesë e garës. Intervistat pritet që të jenë të shkurtra për secilin kandidat dhe jo shumë të gjata (20 deri në 30 minuta për çdo kandidat) dhe sot do të përfundojnë.
Pas intervistimit, brenda 48 orëve, ministri i Brendshëm, pas pikëzimit që do të bëjë Komisioni i përbërë nga tre anëtarët, do të dërgojë emrin tek Këshilli i Ministrave për miratim. Brenda pak ditësh pritet që të kemi edhe emrin e kryepolicit të vendit.
Kujtojmë se ish-kreu i Policisë Ilir Proda qëndroi në këtë detyrë 17 muaj. Ai u largua pas protestës së 28 shkurtit, për shkak se nuk arriti të garantonte rendin dhe sigurinë, pasi protestuesit e opozitës arritën të hyjnë në zonën e ish-Bllokut dhe goditën me molotovë vilën e ish-diktatorit Enver Hoxha, brenda së cilës gjendeshin disa artistë të huaj.
Deri në zgjedhjen e drejtorit të ri, në detyrë është komanduar zëvendësdrejtori Sokol Bizhga.
Përgjithësisht kandidatët në garë janë me karriere të gjatë në këtë fushë dhe që kanë mbajtur disa poste më herët.
14 kandidatët në garë për kreun e Policisë së Shtetit
Afrim Tafa
Alfred Çepe
Arjanit Arapi
Elidon Çela
Gentjan Berberi
Gentjan Shehaj
Idajet Faskaj
Lorenc Panganika
Neritan Nallbati
Pëllumb Seferi
Rebani Jaupi
Saimir Boshnjaku
Skënder Hita
Tonin Vocaj
