Ngordhja masive e peshqve në rezervuarin e Kasharajt, procedohet administratori i firmës së rehabilitimit të digës

Një 58-vjeçar, administrator i një kompanie që po kryen punime për rehabilitimin e digës dhe shkarkuesit të liqenit në fshatin Kasharaj, është proceduar penalisht nga Policia e Lushnjës.

Sipas Policisë, procedimi penal ndaj shtetasit F. M. nisi pasi kompania që ai administron, gjatë punimeve për rikonstruksionin e digës së dëmtuar, nuk ka marrë masat e duhura për menaxhimin e ujërave të rezervuarit.

Si pasojë, një numër i konsiderueshëm peshqish kanë ngordhur në rezervuar.

Specialistët për Hetimin e Krimeve të Komisariatit të Policisë Lushnjë kanë referuar materialet në Prokurori, ndërsa vijojnë hetimet për të dokumentuar plotësisht rrethanat e ngjarjes.

Materialet procedurale i janë referuar Prokurorisë së Fierit për veprime të mëtejshme, për veprat penale “Dëmtimi i habitateve në zonat e mbrojtura mjedisore” dhe “Ndotja e ajrit, ujërave dhe e tokës”.