Donald Trump ka sulmuar sërish aleatët perëndimorë përmes postimeve në Truth Social, duke kritikuar ashpër Mbretëria e Bashkuar dhe Francën, të cilat kanë refuzuar të përfshihen në operacione ushtarake në Ngushtica e Hormuzit.
Në postimin e parë, duke vënë në shënjestër kryesisht Britaninë, Trump deklaroi se vendet që përballen me mungesa të karburantit për shkak të situatës në Hormuz duhet të blejnë nga SHBA dhe të “gjejnë guximin” për të ndërhyrë vetë.
Ai shtoi se Shtetet e Bashkuara nuk do të jenë më të gatshme të ndihmojnë si më parë, duke theksuar se aleatët nuk kanë qenë pranë Uashingtonit në momente kyçe.
“Të gjitha këto vende që nuk mund të furnizohen me karburant për avionë për shkak të Ngushticës së Hormuzit, si Mbretëria e Bashkuar, e cila refuzoi të marrë pjesë në sulmin ‘vendimtar’ kundër Iranit, kam një propozim për ju: Së pari, blini nga Shtetet e Bashkuara të Amerikës, pasi kemi rezerva të bollshme, dhe së dyti, gjeni guximin që ju mungon, shkoni në Ngushticë dhe thjesht merreni vetë.
Duhet të filloni të mësoni si të luftoni vetë; SHBA nuk do të jetë më aty për t’ju ndihmuar, ashtu siç edhe ju nuk ishit për ne. Irani, në thelb, është shkatërruar. Pjesa më e vështirë ka përfunduar. Shkoni dhe merrni naftën tuaj!”
Në një postim të dytë, Trump kritikoi drejtpërdrejt Francën, duke e akuzuar se nuk ka lejuar avionë me destinacion Izraelin, të ngarkuar me materiale ushtarake, të fluturojnë mbi territorin e saj. Ai shtoi se SHBA “do ta mbajë mend” këtë qëndrim.
Deklaratat e Trump vijnë në një moment tensionesh të larta në Lindjen e Mesme dhe rrezikojnë të thellojnë përçarjet mes SHBA-së dhe aleatëve të saj në Evropë.
