Gazetarja Blerina Cene ishte e ftuar këtë të martë në “Quo Vadis” për të analizuar aktivitetin e SPAK gjatë vitit 2025. Ajo foli për rastet më të bujshme të korrupsionit te zyrtarët e lartë.
Ajo vuri në dukje se “tapeti i zi” priti dhe mirëpriti vazhdimisht zyrtarët, ndërsa këtë vit ata që kaluan para kamerave ishin juridikisht korrekt. Fjalimi më i përdorur ishte “do t’ia lë në dorë drejtësisë,” ndryshe nga deklaratat e Veliajt para arrestimit. Kreu i bashkisë së Tiranës deklaronte se shkonte në SPAK për të takuar kolegët.
Blerina Cene: Tapeti i zi po pret dhe mirëpret vazhdimisht zyrtarë. Këtë vit nuk u dëgjuan dy fjali “shkova të pi një kafe” dhe “tavoka kolegët”. Këtë vit zyrtarët që kanë parakaluar në kamera ishin juridikisht korrekt. Fjalimi shpesh i përdorur ishte “do t’ia lë në dorë drejtësisë.” Është një qasje më e mirë ose më korrekte kundrejt SPAK. Struktura e Posaçme e dominoi skenën mediatike, debatin televiziv. Ka qenë pjata kryesore e medias. Për politikën dhe krimin e organizuar ka qenë një kafshatë që nuk është kapërdirë kollaj. Goditja filloi më datën 10 shkurt (arrestimi i Veliajt). Ishte hera e parë që SPAK goditi një zyrtar në krye të detyrës.
Janë 13 raste të korrupsionit pasiv që rëndojnë mbi Veliajn. Sipas SPAK, së bashku me gruan, Ajola Xoxa, Veliaj ka kryer pastrim parash dhe mosdeklarim parash. Rasti i dytë shumë i rëndësishëm ishte 31 tetori, kur zonja Balluku u mor e pandehur nga SPAK. Ishte hera e dytë që SPAK godiste një nivel kaq të lartë të një zyrtari, duke i kërkuar Gjykatës pezullimin nga detyra dhe bllokim të pasaportës. Dosja e fundit shumë e rëndësishme ishte dosja e AKSHI. Ishte një shkrirje e korrupsionit dhe grupit të strukturuar kriminal në kuptimin më të pastër të saj. Një lloj shteti paralel ku ti shikoje që rrëmbehej një biznesmen sepse nuk i ishte bindur asaj që kërkohej nga Agasi, gjithmonë sipas SPAK. SPAK sivjet foli dhe foli mirë.
