Asambleja e 74 kombëtare e OKB nisi punimet me kritika mbi mungesën e veprimeve konkrete për ndryshimet klimatike.
Liderët më të mëdhenj botërore u përballen më një shuplakë të ashpër zemërimi nga të rinjtë të cilët u përfaqësuan në konferencë nga aktivistja e njohur 16 vjeçare, Greta Thunberg. “Ju po na zhgënjeni.
Por të rinjtë po i kuptojnë tradhtitë tuaja. Sytë e të gjitha gjeneratave të ardhshme janë mbi ju. Dhe nëse ju zgjidhni të na zhgënjeni, duhet ta dini se nuk do t’ju falim kurrë.”-u shpreh ndër të tjera aktivistja suedeze.
“Unë nuk duhet të isha këtu, duhet të isha në shkollë në anën tjetër të oqeanit. Por ju akoma kërkoni shpresë nga ne të rinjtë. Si guxoni? Më keni vjedhur ëndrrat dhe fëmijërinë me fjalët tuaja boshe. Njerëzit po vuajnë, shumë të tjerë po vdesin, ekosisteme të tëra po shkatërrohen. Jemi në fillimet e një zhdukjeje masive ndërsa gjithçka për të cilën ju flisni janë paratë dhe përrallat për rritje ekonomike të përjetshme. Si guxoni?.”
Ndërkohë sekretari i përgjithshëm i OKB, Antonio Guterres tha se është koha për të vepruar, për te reduktuar emetimin e karbonit deri në vitin 2050.
“Natyra është zemëruar dhe ne gënjejmë veten nëse mendojmë se mund ta mashtrojmë natyrën. Sepse në të vërtetë natyra godet mbrapsht. Ky nuk ёshtё samit i fjalimeve pёr klimën. Ne kemi folur mjaft. Me natyrën nuk negociohet. Ky ёshtё samiti i veprave”.
Prania e presidentit amerikan, Donald Trump në punimet e asamblesë ishte një surprizë. Ai u shfaq për të dëgjuar folësit, edhe pse pjesëmarrja e tij nuk ka qenë e planifikuar.
Shefi i shtëpisë se bardhe ka shprehur vazhdimisht dyshime ndaj ndryshimit tё klimës tё shkaktuar prej njeriut. Nё vitin 2017 ai shpalli daljen e vendit tё tij nga Marrëveshja e Parisit.
Ndërkohë protestuesit kundër ndryshimit të klimës dolën në rrugët e Uashingtonit, duke bllokuar kryqëzimet kryesore, si pjesë e përpjekjeve të tyre për të paralizuar gjithë qytetin.
Organizatorët u bënë thirrje njerëzve të mos shkojnë në punë ose shkollë por të marrin pjesë në protestë. Grupe tubuesish bllokuan disa rrugë kryesore, duke vënë në lëvizje policinë për të devijuar trafikun.
Aksioni i tyre erdhi pas grumbullimeve dhe marshimeve masive të të rinjve në qytetet e ndryshme të botës, ku morën pjesë qindra mijëra vetë me kërkesën për veprime urgjente kundër ndryshimit të klimës.
