Një ditë pas skandalit me sigurinë ushqimore, ku u zbulua se nga Brazili në Shqipëri kanë hyrë 7.9 ton mish pule me salmonelë, policia shpalli në kërkim administratorin e kompanisë importuese “AMG Food”, Arben Goxha, 50 vjeç. Së bashku me të vëllanë, Mondi Goxha, i cili është vënë nën hetim nga policia, 50-vjeçari Arben Goxha akuzohet se ka importuar ushqime të rrezikshme për shëndetin ose jetën e njerëzve.
Hetime kanë nisur edhe për tre inspektorët e Autoritetit Kombëtar të Ushqimit, Gëzim Hushi, Sada Lufta dhe Aldo Sinjari, të cilët, sipas policisë, kanë shpërdoruar detyrën, duke lejuar futjen në treg të filetove të pulës me salmonelë.
Lexo edhe :
Produkti i ardhur nga Brazili është futur në vendin tonë përmes Portit të Durrësit, ndërsa më 21 mars, përgjigjet e analizave të kryera në Institutin e Sigurisë Ushqimore dhe Veterinare kanë treguar se mishi është i kontaminuar me salmonelë.
Në pritje të përgjigjes së analizës, AKU tha se kompanisë “AMG Food” i ishte kërkuar të ruante produktin në ambientet frigoriferike dhe të mos e tregtonte. Por, në shkelje të ligjit, kompania e ka shitur atë në biznese të nivelit të dytë.
AKU ka bllokuar deri tani nga ngarkesa vetëm 4 ton mish me salmonelë.
/vizionplus.tv
