Ndryshimet në kabinetin qeveritar mbrëmjen e kësaj të enjteje ishin tema e diskutimit në studion e Quo Vadis të moderatores Pranvera Borakaj në Vizion Plus.
Në një lidhje me emisionin Quo Vadis, deputeti demokrat Saimir Korreshi komentoi lëvizjet e fundit në qeveri, të cilat sipas tij janë thjesht makiazh.
Sipas Korreshit, sot nuk ka asnjë ndryshim real, janë thjesht disa lëvizje të Ramës për të tërhequr vëmendjen.
Pjesë nga biseda:
Borakaj: Si i patë ndryshimet në qeveri?
Korreshi: Është bërë e modës që kryeministri Rama këta i trajton si gurë shahu, si ushtarë të gjithë këta. Sa herë që dikush i prish qejfin Ramës, ky i ndryshon. Edhe pse pretendon se do bëjë reforma, nuk është se ka bërë ndonjë gjë të madhe. Ka ikur Balluku, ka vënë dy njerëzit e saj, drejtorin e OSHEE-së, hoqi Piron dhe vuri po njeriun e saj. Nuk mjafton ikja e saj. Ajo që kërkon rregullorja dhe Kushtetuta duhet të zbatohet. Më vjen keq për Spiropalin se si doli gjë, ngeli roje te dera. Çfarë të them për Ministrinë e Brendshme? Iku ajo që merrej me monopatinat, po vjen ky që merret me parkimet dyshe. Çfarë të them për Tonin? Vetë Lamallari, pas atij insistimi në Parlament, e kuptoi që vetë harta territoriale në gjyqësor shkatërroi gjithë gjyqësorin. Unë mendoj që nuk ka bërë asgjë më tepër, thjesht një makiazh. Ka promovuar ata njerëz që edhe kur flasin në Parlament, nuk i besojnë ato që thonë. Gogu nuk i beson ato që thotë.
