Të hënën, Parlamenti pritet të kalojë në votim ndryshimet në Kodin Zgjedhor, pa konsensusin e opozitës dhe të një pjesë të opozitës parlamentare.
Kryetari i Forumit Rinor të Partisë Demokratike, Belind Këlliçi, teksa ishte i ftuar në studion e lajmeve në “Vizion Plus”, u shpreh i sigurt se ndryshimi i Kushtetutës bëhet vetëm për të minimizuar humbjen e PS-së në rezultatin e zgjedhjeve të 25 prillit.
“Asnjë pasojë, përpos faktit që po ia dalin në historinë e pluralizmit në Shqipëri që të ndryshojnë Kushtetutën në mënyrë të njënashme. Këtë e bën vetëm për një qëllim: për të minimizuar humbjen në 25 prill. Këtë e them i bindur nga takimi me qytetarët, sondazhet, e mbi të gjitha nga zullumet që ka bërë PS në këto 7 vite. Është një teknikalitet për t’i marrë mandate opozitës. Mund të na dëmtojë. Shqiptarët duhet të kenë parasysh një precedent të rrezikshme që po vë kjo qeveri. Nesër i jep të drejtë PD, ditën që do të vijë në qeveri që nëse ka vota në Parlament, ta nxjerrë edhe nga ligji PS. Është prishur konsensusi.”
Këlliçi foli mes të tjerash edhe për përfshirjen e Partisë Demokratike në një proces zgjedhor për përzgjedhjen e kandidatëve për deputetë.
“Ka një risi. Në fund të këtij procesi, lista do të përbëhet nga trupa e administratës me të cilën do të drejtojë PD Shqipërinë. Në 400 emra, nuk kemi njerëz me precedente kriminale dhe të shkuar të errët. Kjo është një arritje e padiskutueshme.”
