Një incident me rrezikshmëri është shënuar pasditen e sotme në lagjen “Guerrile”, Shkodër, ku një automjet me dy persona në bord nuk i është bindur urdhrit të Policisë për ndalim.
Ngjarja ka ndodhur rreth orës 15:10, gjatë patrullimit rutinë, kur shërbimet e Policisë i kanë bërë shenjë ndalimi automjetit për kontroll.
Drejtuesi ka refuzuar të ndalojë, duke rritur shpejtësinë dhe duke kryer manovra të rrezikshme në rrugë.
Për pasojë, efektivët janë vënë menjëherë në ndjekje të mjetit. Gjatë largimit, dyshohet se pasagjeri ka qëlluar një herë në ajër me armë zjarri dhe më pas është arratisur.
Policia ka arritur të ndalojë dhe të shoqërojë drejtuesin e automjetit, identiteti i të cilit nuk bëhet publik për shkak të hetimeve në vijim.
NJOFTIMI:
Rreth orës 15:10, gjatë patrullimit në lagjen “Guerrile”, shërbimet e Policisë i kanë bërë shenjë ndalimi, një automjeti me të cilin lëviznin 2 shtetas, me qëllim kryerjen e kontrolleve. Drejtuesi i automjetit nuk i është bindur urdhrit të punonjësve të Policisë, por ka shtuar shpejtësinë e lëvizjes dhe ka kryer manovra të rrezikshme me automjet.
Për këto arsye, shërbimet e Policisë i janë vënë në ndjekje automjetit. Gjatë ndjekjes, dyshohet se pasagjeri në këtë automjet, duke u larguar ka qëlluar një herë, në ajër, me armë zjarri, dhe është larguar.
Shërbimet e Policisë kanë kapur drejtuesin e automjetit, inicialet e të cilit nuk bëhen të ditura për momentin, për shkak të konfidencialitetit të hetimit.
Ndërkaq, vijon intensivisht puna për lokalizimin dhe kapjen e pasagjerit në këtë automjet.
Grupi hetimor, në drejtimin e Prokurorisë, po punon për të zbardhur rrethanat e rastit.
