Kreu i Partisë Demokristiane, Nard Ndoka, që është edhe aleat i PD, mendon se listat e hapura të kandidatëve për zgjedhjet janë në favor të partive të vogla. Duke folur nga studioja e lajmeve të “Vizion Plus”, Ndoka deklaroi se partitë që dëmtohen në këtë rast janë PD dhe LSI.
“Partitë e vogla nuk rrezikohen nga listat e hapura, ky është një avantazh. Neve na interesojnë. Kjo u shërben partive të treta politike. Është shumë e rëndësishme për PDK që ne të kemi një listë të hapur ku të futen edhe emra të rinj që e shohin politikën si një mundësi kontributi. Por dëmton partitë kryesore, edhe PD, edhe LSI. Krijohen xhelozi, përplasje. Do të kemi një produkt befasues. Ndoshta ikëm nga shiu dhe do të përfundojmë në breshër, Askush nuk e di se cila do të jetë përbërja e Parlamentit vitin e ardhshëm.”
Teksa nga zgjedhjet parlamentare të 2021 na ndajnë edhe shtatë muaj, Ndoka tha për “Vizion Plus” se në kampin opozitar po bëhen përgatitje. Ai u shpreh se po diskutohet për mundësitë e koalicioneve.
“Ne dëshirojmë që të kemi një përmbyllje totale të Kodit Zgjedhor, pra të përshtaten edhe ato ndryshime që kanë kaluar në Kuvendin e Shqipërisë. Të ketë një qasje përfundimtare edhe nga ana e mazhorancës. Opozita e ka agjendën e vet, formën dhe mënyrën sesi do të organizohet sesi do të ketë një koalicion si opozitë e bashkuar. Ka një ndryshim edhe me 2017 sepse atëherë pati një marrëveshje, nuk pati koalicione dhe u detyruam të gjithë së bashku të kandidonim nën siglën e PD. Është krejt normale që çdo parti politike të ketë kandidatët e vetë në të gjithë Shqipërinë. PDK është në hapat e fundit të plotësimit të listës së kandidatëve që do të jenë përfaqësues të PDK. Pastaj do të ketë një marrëveshje me PD se cili do të jetë variant përfundimtar Ne u qëndrojmë koalicioneve klasike.”
Nard Ndoka theksoi se opozita, në çdo formë, nuk ka frikë të përballet me mazhorancën, të cilën e konsideron të shkërmoqur.
