Kreu i Partisë Demokratike Sali Berisha ka zhvilluar këtë të premte një takim me aleatët e të djathtës.
Qëllimi i takimit është gjetja e një ujdie të përbashkët për reformën zgjedhore dhe territoriale.
“Ky takim ka qëllim kryesor të gjejmë një ujdi së bashku si një front i gjerë për reformën zgjedhore dhe reformën territoriale. Në fakt, reforma themelore të një sistemi, duhet pranuar. Sot, Shqipëria është një njollë e zezë në hartën e Europës. Është zyrtarisht, pas raportit të fundit të OSBE/ODIHR, autokraci elektorale apo diktaturë autoritare. Do të thotë regjim që e pranon pluralizmin, por e shtyp pluralizmin. Ky është i gjithë thelbi i saj. Nuk është totalitare sepse e pranon pluralizmin“, tha Berisha.
Por Nard Ndoka ka qenë një zë kritik në këtë takim. Ai i ka thënë Berishës, se aleatët janë përdorur gjithmonë si tabelë qitje për reformat që janë ndryshuar disa herë. Ai theksoi se ndonëse aleatët po i sjellin vota PD-së, ata janë parë gjithmonë si barrë dhe nuk u është dhënë aq sa meritojnë.
“Krijohet një frymë tek militantët, sikur aleatët janë një peshë, një kosto. Na bëni neve tabelë qitje, aleatët janë vota për ju, dhe marrim shumë më pak se na takon në bazë të peshës elektorale. Që në vitin 2008 kur ka ndryshuar kodi ne nuk testohemi se futemi në koalicion, numërohen vota q mbesin të shkruara në letër dhe jo ato mijëra në Tiranë që i merrni përmes koalicionit. Kjo është hile e qëllimshme, e dëgjoj në takimet e foltores që shigjetohen aleatët sikur jemi e keqja. LSI para disa viteve ka pasur 100 mijë vota, goditjet që erdhën, kishte edhe Ramën përballë dhe Bashën, por edhe partia demokristian, ne kemi pasur 58 mijë vota, që thonë 6 mandate, por duke qenë pjesë e këtyre koalicioneve kemi firuar“, tha Ndoka./vizionplus.tv
