Çmimet e naftës shënuan rritje, ndërsa rebelët Houthi të mbështetur nga Irani në Jemen u përfshinë në konfliktin në Lindjen e Mesme. Situata u tensionua më tej pas mbërritjes së trupave amerikane në rajon, duke shtuar frikën se zgjerimi i luftës mund të shkaktojë trazira të reja në tregjet globale të energjisë.
Nafta Brent, që po shkon drejt një rritjeje mujore rekord, u rrit deri në 3.7%, duke arritur në 116.75 dollarë për fuçi. Ndërkohë, nafta Ëest Texas Intermediate kaloi mbi 100 dollarë për fuçi.
Rebelët Houthi kanë lëshuar raketa drejt Izraelit gjatë fundjavës dhe kanë deklaruar se do të vazhdojnë operacionet derisa të ndalen sulmet ndaj Iranit dhe grupeve të tij aleate.
Shtetet e Bashkuara kanë urdhëruar dërgimin e mijëra ushtarëve në rajon, duke rritur shqetësimet për një përshkallëzim të mundshëm me ndërhyrje tokësore.
Në një intervistë për Financial Times, presidenti amerikan Donald Trump deklaroi se synon të “marrë nën kontroll naftën e Iranit” dhe nuk përjashtoi mundësinë e marrjes së qendrës kryesore të eksportit në ishullin Kharg, një veprim që mund të shkaktojë reagim të ashpër nga Teherani. Më herët gjatë këtij muaji, SHBA goditën objekte ushtarake në këtë ishull.
Gjatë muajit mars, çmimi i naftës Brent është rritur me rreth 60%, pasi përplasjet mes Shteteve të Bashkuara, Izraelit dhe Iranit kanë tronditur tregjet globale. Kjo situatë ka rritur shqetësimet për një rritje të njëkohshme të inflacionit dhe një ngadalësim të ekonomisë botërore.
Konflikti ka hyrë në javën e pestë dhe nuk ka shenja të qarta për ulje tensioni, pavarësisht përpjekjeve diplomatike të fundit nga Uashingtoni dhe bisedimeve të veçanta për paqe të zhvilluara në Pakistan gjatë fundjavës, sipas raportimeve të Bloomberg.
