Rreshjet e dendura të ditëve të fundit kanë krijuar vështirësi në disa zona të qarkut Korçë, ndërsa strukturat vendore dhe ekipet e emergjencës po vijojnë ndërhyrjet në terren për normalizimin e situatës.
Në disa akse rrugore ka pasur vështirësi kalimi për shkak të prurjeve të larta të ujit, si në segmentet Denas–Lekas, Lubonjë dhe në disa zona të Korçës e Kolonjës, ku ndërhyrja me mjete të rënda ka bërë të mundur zhbllokimin dhe drejtimin e ujërave. Në Voskopojë, niveli i ujëmbledhësit u rrit ndjeshëm, por hapja e kanalit shkarkues stabilizoi situatën.
Në territorin e qarkut janë evidentuar edhe dëmtime të urave, si ura në Çetë mbi Miras dhe ura e Arrzës, ku qarkullimi është pezulluar ose devijuar në rrugë alternative, ndërsa priten ndërhyrje rehabilituese. Prurje të shumta janë regjistruar edhe në disa përroi të zonës së Shelegurit dhe në rezervuarët e Rotit e Kodrës, ku ekipet kanë marrë masa për garantimin e sigurisë.
Në fushën e Maliqit po monitorohet me intensitet pika e bashkimit të lumit Dunavec me lumin Devoll, pasi prurjet e ujit janë shumë të larta dhe paraqesin rrezik të shtuar.
Edhe në akset rrugore kombëtare, ekipet e ARRSH Qendër–Lindje raportojnë situatë të menaxhueshme. Janë kryer pastrime dhe ndërhyrje në segmentet Ersekë–Leskovik, Maliq–Lozhan dhe Qafë e Qarrit–Ersekë, duke mundësuar kalueshmëri të plotë.
Ndërkohë, ekipet e OSHEE vijojnë punën për rikthimin e energjisë elektrike në zonat ku ka defekte. Aktualisht, 148 abonentë mbeten pa energji në fshatra të Korçës, Devollit, Kolonjës dhe Maliqit, për shkak të defekteve në fidrët Gjanc, Korçë 1, Mollas dhe Vithkuq.
Strukturat vendore, ekipet e ARRSH dhe ato të OSHEE-së vijojnë monitorimin e situatës në të gjitha zonat e prekura. Deri tani nuk raportohen rreziqe për jetën e qytetarëve apo dëme në banesa, dhe ndërhyrjet do të vazhdojnë deri në normalizimin e plotë të gjendjes në të gjithë qarkun.
