“Mos na merrni ujin!”, me këtë thirrje, banorët e fshatit Burimas në Maliq kanë dalë në protestë, duke bllokuar rrugën hyrëse të fshatit. Ata kanë ndaluar mjetet e Drejtorisë së Ujësjellës-Kanalizimeve të Korçës.
Shkak i protestës është një projekt për furnizimin me ujë të pijshëm të fshatit fqinj, Zvezdë. Banorët e Burimasit kundërshtojnë marrjen e ujit nga burimi i fshatit të tyre, duke argumentuar se kjo mund të ndikojë në furnizimin e tyre me ujë.
Për banorët, zgjidhja është që investimi për Zvezdën të realizohet pa prekur burimin e ujit të Burimasit.
“Për momentin ne kemi ujë dhe do t’i falemi Zotit për natyrën që na ka dhënë. Nuk na dha as bashkia as ujësjellësi. Ne protestojmë sepse duam të mbrojmë ujin. Kërkojnë të na i marrin edhe këtë ujë dhe t’ia japin fshatit Zvezdë. Jemi ngritur dhe do ngrihemi, do vijojmë ta kërkojmë me forcën më të madhe që të mos e marrin ujin”, thotë një banore.
“Ne jemi mbledhur për punën e ujit. Kemi vuajtur 20 vjet për ujë. Tani që kemi ujë 24 orë duan të na i marrin”, thotë një banor.
Nga ana tjetër, të kontaktuar , përfaqësues të Drejtorisë së Ujësjellës-Kanalizimeve në Korçë shprehen se projekti i ri, tashmë i miratuar, parashikon që një pjesë e konsiderueshme e zonës do të furnizohet me ujë të pijshëm.
Sipas tyre, ndërhyrja bëhet në kuadër të projektit për përmirësimin e furnizimit me ujë të banorëve të Zvezdës dhe jo vetëm, një problem i kahershëm që pritet të marrë zgjidhje së shpejti për zonën e Maliqit.
Edhe gjatë vitit të kaluar, banorët e Zvezdës kanë protestuar, duke kërkuar zgjidhje për mungesën e ujit të pijshëm.
Ndërsa sot, konflikti është zhvendosur në Burimas, ku banorët thonë se nuk do të lejojnë që zgjidhja e problemit të Zvezdës të bëhet duke cenuar ujin e tyre të pijshëm.
