Mjedisi është një kapitujt që do t’i kushtojë më shumë Shqipërisë në procesin e negociatave me Bashkimin Europian, si në kohë, ashtu edhe në para.
“Dua të siguroj bizneset që gjatë negociatave kemi insistuar që të sigurohen periudha tranzitore të mjaftueshme për sektorin privat. Kjo do të bëjë që bizneset të kenë kohën e nevojshmepër të përshtatur teknologjitë dhe për të mos u penalizuar me anëtarësimin e Shqipërisë në Bashkimin Europian. Dy vitet e ardhshme janë vite politikbërje dhe pune intensive në hartimin e legjislacionit. Ministria ka vendosur si objektiv përgatitjen mujore të paketave ligjore, të cilat do t’i nënshtrohen konsultimit publik dhe shqyrtimit nga ekspertët teknikë të Komisionit Evropian, për të garantuar përputhjen e plotë me standardet e BE-së. Fatura financiare e përllogaritur nga ekspertët për kapitullin e mjedisit është 9.8 miliardë euro”, tha ministri i Mjedisit Sofjan Jaupaj.
Mbi një vit pas sekuestrimit të rreth 2,800 ton mbetjeve të rrezikshme që u kthyen nga Tajlanda dhe që mbahen ende në kontejnerë në Porto Romano, ministri i Mjedisit Sofjan Jaupaj gjatë një konference me gazetaret tha se ekzistojnë dy rrugë që mund të ndiqen për asgjësimin e tyre.
“Janë dy rrugë që mund të ndiqen. Ose do të ketë eksport për t’u asgjësuar në vendet e huaja, ose nëse vendoset që këto mbetje do të asgjësohen këtu, do të japim mbështetje me subjektet private në Shqipëri që kanë kapacitete dhe mundësi për asgjësimin e tyre. Për shkak të ndjeshmërisë, i gjithë procesi do të jetë transparent”, shtoi Jaupaj.
Sa i takon reformës së menaxhimit të mbetjeve, ministri bëri të ditur se Shqipëria është e ndarë në 10 zona dhe për secilën prej tyre janë hartuar plane të detajuara investimesh, të cilat do të nisin gradualisht nga viti 2026 dhe do të vijojnë në vitet në vazhdim./vizionplus.tv
