Autoriteti Rrugor Shqiptar shpall kompaninë “Biolap A.T.E.VE” dhe në “JV” me kompaninë Geci fituese për mirëmbajtjen e akseve rrugore në veri të vendit gjatë 5 viteve të ardhshme.
Sipas burimeve nga Autoriteti Rrugor Shqiptar, një konsorcium greko-shqiptar ka dhënë ofertën më të ulët prej 21,2 milionë euro, për mirëmbajtjen e rrugëve të qarkut të Shkodrës dhe Kukësit.
Tenderi është pjesë e një projekti të përbashkët të qeverisë shqiptare dhe Bankës Botërore për të financuar me rreth 128 milionë euro mirëmbajtjen e rrugëve përmes ndarjes në katër zona, sipas shtrirjes gjeografike. Për tre rajonet e tjera fituesit ishin shpallur më parë dhe tenderi i fundit mbyll kështu kontratat për të gjithë Shqipërinë.
Sipas Autoritetit Rrugor, kompanitë do të bëjnë jo vetëm mirëmbajtjen fizike, por edhe investime për te rritur sigurinë rrugore. Projekti me Bankën Botërore synon që të reduktojë me 15 përqind numrin e aksidenteve rrugore.
