Një grup qytetarësh nga Mirdita u nisën drejt Thethit, në një akt solidariteti me banorët e zonës së Dukagjinit.
Nën moton “Mirdita solidarizohet me Dukagjinin”, aktivistë dhe qytetarë nga Mirdita do të zhvillojnë këtë vizitë në zonat e Shalës dhe Shoshit, për të treguar përkrahjen ndaj komuniteteve që po përballen me sfida të rënda sociale e administrative.
Mirditorët u shprehen se ky udhëtim nuk është thjesht simbolik, por një thirrje për ndërgjegjësim kombëtar dhe veprim konkret.
“Kur shteti kthehet në një agresor, sigurisht që populli mbledh Kanunin. Kryeministri jonë është kthyer në një agresor, para votimeve shkoi i tha “i gëzofshi”, pas votimeve i shembi. Nuk është tokë e xanun ajo, është tokë e trashëguar, është tokë e vaditur me gjak ajo”, tha një qytetar.
Banorëve i është bashkuar edhe ish-deputeti Kujtim Gjuzi.
“Ne iu përgjigjëm thirrjes së Zef Gjonajt për të qenë në Theth. Thethi është i thethianëve. Të shkosh në Dukagjin dhe të shembësh shtëpitë pasi i ke thënë “shtëpitë do t’i gëzoni”, nuk është vetëm prerje në besë, është krim bastard. Rama duhet të lexojnë Kanunin e Lekë Dukagjinit. Nuk është kërcënim, por ka bërë një gabim që duhet ta shlyejë”, tha Gjuzi.
“Jemi nisur drejt Dukagjinit, Thethit, aty ku është bërë një masakër e jashëzakonshme. Ne po dalim të sensibilizohemi me vëllezërit tanë nga Dukagjini. Luftë nuk do bëjmë me qeverinë, por ta shohim masakrën që është bërë”, tha një qytetar.
“Jemi nisur për të shkuar në drejtim të Thethit, një grup mirditorësh. Ne po shkojmë të solidarizohemi me ta, t’i themi që vuajmë dhimbjen me ta”, tha një tjetër.
Ditën e djeshme u mbyll aksioni i IKMT në Parkun Kombëtar të Thethit. Sot, 15 korrik, pritet që në zonë të nisin punën forcat e ushtrisë, si dhe të pushtetit vendor për të pastruar inertet.
Në këtë aksion janë prishur 70 objekte të ndërtuara përgjatë vitit të fundit pa leje. Banorëve u është kërkuar që të aplikojnë në Paketën e Maleve për të qenë përfitues të zhvillimit të zonës sipas rregullave./vizionplus.tv
