Kryefjala e debatit të sotëm në komisionin për punën, çështjet sociale dhe shëndetësinë sa i takon projektligjit për studentët e mjekësisë, ishte ligjshmëria e tij.
Ministrja e arsimit dhe sportit, Evis Kushi theksoi se është interesi publik ai që detyron vendimmarrje të tilla, ndërsa studentët e ardhshëm kanë të drejtë të zgjedhin.
EVIS KUSHI
MINISTRE E ARSIMIT DHE SPORTIT
“Ne duhet të mbështesim atë kategori që duan të punojnë dhe jetojnë e kontribuojnë në Shqipëri apo ata që e kanë ndarë mendjen që në fillim që të bëjnë një arsimim pothuajse falas dhe pastaj të ikin të kontribuojnë për vendet e tjera? Kjo është dilema jonë dhe arsyeja që na ka sjellë ne në këtë vendimmarrje. Dua ta ritheksoj se kjo është një praktikë që aplikohet edhe nga vendet si Gjermani, jo vetëm për mjekësinë por edhe programe të tjera.”
Sakaq, opozita shprehet se kjo politikë është sovjetike, në shkelje të të drejtave njerëzore dhe si e tillë nuk do të sjellë asnjë rezultat pozitiv.
TRITAN SHEHU
DEPUTET I PD
“E penalizon më tepër me këtë gjë, ata që duan të ikin, do ikin, edhe pas 5 vjetësh, ai që sapo ka mbaruar fakultetin nuk e kuron dot të sëmurin, pa bërë specialzimin, ne ulim në këtë mënyrë nivelin e shërbimit shëndetësor dhe trajtimin ndaj të sëmurit. Nuk zgjidhet kështu problemi. Si ti kthejmë ata që janë specializuar jashtë sepse kanë nivel të lartë shkencor dhe profesional? Duhet të fokusohemi të tërheqim ata që janë jashtë. Kemi degraduar në një sistem diktatorial. Na duhen politika afatgjata dhe të qëndrueshme.”
Projektligji do të kalojë për miratim në kuvend me procedurë të përshpejtuar dhe do ti paraprijë aplikimit në universitete, një proces që nis më 29 korrik. Por studentët aktualë në programin e mjekësisë së përgjithshme janë të vendosur për ta çuar çështjen në Gjykatën Kushtetuese, ndërsa kanë paralajmëruar se do të bojkotojnë vitin e ardhshëm akademik.
