Ministria thirrje sipërmarrjeve turistike: Dezinfektoni krevatët e plazhit, të ruhet distanca fizike

Ministria e Shëndetësisë ka drejtuar një thirrje për të gjitha sipërmarrjet turistike që të zbatojnë me rigorozitet masat e marra kundër përhapjes së koronavirusit.

Ministria ka kërkuar nga hoteleritë dhe baret e restorantet që të garantojnë distancën fizike mes stafit të shërbimit dhe turistëve. Kjo distancë, sipas ministrisë, nuk duhet të jetë më pak se 1.5 metër.

“Të zbatohen me rigorozitet masat e pastrimit dhe dezinfektimit në të gjitha zonat bufe, bare, restorante, kuzhina në të gjitha strukturat akomoduese. Të tregohet kujdes në përdormin e ashensorit në strukturat akomoduese që e disponojnë atë, duke respektuar masat e distancimit dhe të higjienës. Të kryhet dezinfektimi i krevateve të plazhit, shërbimeve higjienike dhe aksesorëve të ndryshëm në mënyrë periodike. Të respektohet hapësira midis çadrave dhe ndenjëseve të pushuesve në distancë jo më pak se 3.5 m dhe të evitohen grumbullimet shoqërore.”

Këtë të premte u shënuan 77 raste të reja me koronavirus dhe 2 viktima të tjera.