Ministri i Drejtësisë, Ulsi Manja gjatë fjalës së tij në Kuvendin, në seminarin publik me temë “Veprimet gjithëpërfshirëse në luftën ndaj korrupsioni” vlerësoi punën e bërë nga Prokuroria e Posaçme.
Z.Manja tha se krijimi i SPAK është një hap i rëndësishëm në luftën kundër korrupsionit dhe krimit të organizuar.
Ministri i Drejtësisë deklaroi se Prokuroria e Posaçme ka arritur të hetojë dhe dërgojë në gjyq figura të larta të politikës dhe administratës, si ish-presidentë, ish-kryeministra, ministra, dhe deputetë, çka ka sjellë besim në sistemet e drejtësisë.
Manja: Reforma në drejtësi është gurthemeli i luftës tonë kundër korrupsionit. Procesi i vettingut ka pastruar sistemin nga individë që nuk përmbushnin standardet e integritetit. Më 21 nëntor 2024, KPK dha vendimin e fundit duke përmbyllur me sukses mandatin sipas kushtetutës dhe ligjit të rivlerësimit së bashku me KP. Në sitën e vettingut kaluan 805 subjekte: gjyqtarë, prokurorë, këshilltarë ligjorë dhe ndihmës ligjorë. Ky proces ka rikthyer besimin tek drejtësia, duke siguruar që askush të mos jetë mbi ligjin.Krijimi i një sistemi gjyqësor më të fortë dhe të pavarur është faktor kyç në garantimin e sundimit të ligjit dhe në krijimin e një ambienti të favorshëm për investime dhe zhvillim ekonomik.
Organet e reja kushtetuese të sistemit të drejtësisë (KLGJ, KLP dhe Drejtuesi SPAK) si bartëse të ushtrimit të funksioneve të KPK, respektivisht KLGJ për gjyqtarët dhe KLP për prokurorët e sistemit dhe Drejtuesi i SPAK në ushtrimin e funksioneve të Komisionerit Publik, të vazhdojnë me të njëjtat standarte të krijuara nga procesi i vettingut dhe të certifikuar nga GJEDNJ me qëllim që sistemi të mbahet i pastër nga korrupsioni për të mos rënë përsëri në gjendjen që ishte përpara reformës në drejtësi.
SPAK është kthyer në model suksesi në luftën kundër korrupsionit të nivelit të lartë dhe sot është kthyer në institucionin më të besueshëm për publikun. Në hetim ka ulur për gjykim figura të njohura të politikës dhe administratës, duke përfshirë ish-presidentë, ish-kryeministra, ish-zëvendëskryeministra, ministra dhe deputetë. Pasuritë e paligjshme të zyrtarëve të lartë po identifikohen, sekuestrohen dhe konfiskohen.
Krimi i organizuar dhe asetet e tij kriminale janë vënë nën shënjestrën e kësaj strukture speciale dhe në bashkpunim dhe me agjensitë homologe në evropë dhe amerikën latine janë goditur një numër i konsiderueshëm grupesh kriminale.
