Ministri për Evropën dhe Punët e Jashtme, Igli Hasani në fjalën e tij gjatë një bashkëbisedimi me gazetarët këtë të premte tha se ky vit ka shënuar 15 vjetorin e anëtarësimit të Shqipërisë në NATO një hap i rëndësishëm për forcimin e sigurisë dhe stabilitetit në rajon.
Ministri shtoi se në vitin 2027 vendi ynë mikpret Samitin e Aleancës.
Hasani: Ky vit ka shënuar 15-vjetorin e anëtarësimit të Shqipërisë në NATO, një hap të rëndësishëm për forcimin e sigurisë dhe stabilitetit në rajon. Shqipëria mbetet e angazhuar në Aleancën e Atlantikut të Veriut dhe ka mirëpritur angazhimin e NATO-s në Ballkanin Perëndimor. Hapja e bazës ajrore taktike të NATO-s në Kuçovë është një shembull i investimeve të Aleancës në Shqipëri, duke siguruar stabilitet për rajonin.
Nënshkrimi i Letrës së Qëllimit me Italinë, Maqedoninë e Veriut, Bullgarinë dhe Rumaninë për realizimin e projekteve të Korridorit VIII Pan-Evropian. Ky korridor do të lidhë detin Adriatik me Detin e Zi, dhe ka një ndikim të drejtpërdrejtë në zhvillimin ekonomik të rajonit.
Në qershor 2024, Shqipëria u bë vendi i 36-të anëtar i Qendrës së Ekselencës për kërcënimet hibride në Helsinki, duke forcuar kështu angazhimin e saj në sigurinë globale.
Po ashtu, ka nisur bashkëpunimi konkret me NATO-n për organizimin e Samitit të Aleancës në Tiranë në vitin 2027, ku Shqipëria do të jetë vendi i parë që do të presë një ngjarje kaq të rëndësishme në rajon.
